تفتكر حد هيفهم
قليلين أكيد
بس على الأقل فيه حد بيحاول يقول حاجة
الواحد خلاص اتخنق
آه مسرحية كنت أعمى أهيه
كلمات ترنيمة، صور المسيح تظهر، الخروف الضال
بس تفتكر المسيح لما بيدور على مينا اللي مشي وسابه هو كمان بيقيد حريته
هو بس بيكلمه مضربوش على إيده وقاله لازم ترجع بالعافية
آه صحيح، أنا بيعجبني مثل الابن الضال جدًا علشان كده
الأب وافق أن الابن يمشي، وإداله نصف الميراث كمان وكل اللي عمله أنه عاش بالأمل أن ابنه يرجع له تاني
صحيح، وتعرض لغضب الابن التاني، يعني كمان خد موقف شبه مؤيد لحرية ابنه وتحمل تبعاته
وإيه كل اللي عمله أنه وقف يستناه لما هو يرجع من نفسه مبعتلوش حد يجيبه بالعافية
تفتكر فيه أمل؟
مفتكرش
5 comments:
أكيد في أمل طول ما في ناس زيك يا وَحش، ناس بتفكر، وبتحلم إن نعمة التفكير تكون من نصيب ناس تانية كتير اتربت علي السمع والطاعة. (ملحوظة جانبية: معلهش ماتزعلش مني، اصلي اليومين دول مودي مش أد كده).
هي كانت مكتومة جوايا بقالها شهر، من أول ما منال كتبت التدوينة المنيلة بتاعتها و احنا الهجوم شغال عندنا و مبيخلصش، و المصيبة أن الهجوم بدأ بعد نشر التدوينة بأسبوع يعني المدونين و قرائهم المعتادين مش واخدين بالهم أصلا من اللي بيحصل و سايبينا مسحولين.
المهم فضلت أفكر أكتب شتيمة، طب أكتب تحليل و أنظر على الناس اللي طلعتلنا؟ أعبر لأول مرة عن ايديولوجيتي الدارونية؟ كل يومين أخترع رد
لحد ما أكتشفت أن مشكلتي مش في الهجوم، مش في اختزال اسانيتي و انساني مراتي، مش في التشكيك الغريب في الميول و القدرات الجنسية، مش في كل ده، مشكلتي في قولبتنا و الخناق مع كائنات وهمية غير موجودة غير في دماغ اللي بيتخانق، مشكلتي في الغاء العقل (مش عشان تشغيله هيوصل لنفس نتائجي، عشان تشغيله هيخلي احوار له معني بس)، مشكلتي مش في انكار انسانيتي و حقي في الحياة، مشكلتي في تبسيط و تسطيح أفكاري.
عشان كده كفاية علي أنك قريت الكلام و حركك لدرجة أنك تكتب عنه (و لو أنك طبعا الكلام مكانش موجهلك و لا انت محتاج تقرأه أصلا)
اه نسيت أقول
فيه أمل
مش عشان في حاجة حصلت تخليني أحس بالأمل
عشان لو مفيش أمل هتعمل ايه يعني؟ ايه البديل عن انك تحاول؟ دايما يفضل فيه أمل عشان ده أحسنلك و أسلملك.
و بعدين صدقني احباط اللي حاول و منالش و اللي حاول و اتبهدل أخف بكتير من احباط اللي اتبهدل و هو ماشي جنب الحيط و اللي حس انه محققش حاجة بعد ما سمع الكلام و اتبع كل القواعد.
أنا باتابع كل حاجة بتحصل في المدونة بتاعتكم، كل اللي انتم بتكتبوه وبيترد به عليكم، والنهاردة لما ابتدا الهجوم وقريت محاولتك للرد وشرح وجهة نظرك للشتامين اللي خايفين يقولوا حتى هما مين، حقيقي احترمت محاولتك المستميتة في تنوير اللي مغمضين عينهم وملهمش حتى ودان يسمعوا بها، وعلى رأيك مصممين يدخلوا على مدونتك برضه، بافكارهم وقلوبهم المتحجرة، أنتم زي ما حنا قال الأمل ان فيه حاجة تتغير، لحظات اليأس بتصيبنا كلنا، بس زي ما أنت بتقول الأمل والمحاولة أحسن من أن الواحد يموت مقهور، مشلول، بس الإيمان بالحرية تمنه غالي وهو ده اللي أنت بتدفعه، وبيدفعه أي واحد زيك (تنين ومحارب). أشكرك
لسة فيه أمل
و لو حتى كان ف آخر دقة قلب ف صدرك
Post a Comment