Sunday, November 13, 2005

امتحان السواقة في بلاد الفرنجة- النظري

بقالي اسبوع وأكثر بذكر علشان أدخل امتحان السواقة في بلاد الملكة والسواقة على الناحية التانية، والموضوع هنا آخر كلكعة في الحقيقة، وطبعًا مقارنة بالكوسة والسبهللة في مصر وسهولة الحصول على الرخصة، ودهس خلق الله، والسير بلا أي قواعد مرور، الواحد هنا بيتعقد في عيشته، آخر تعقيد. علشان تتعلم السواقة هنا السكة بتكون طوييييييلة، وفي الحقيقة مبيسيبوش حاجة من غير الواحد ما يدفع دم قلبه. أول حاجة، لازم الواحد يطلب منهم استمارة، والاستمارة تتملي، يتبعت معاها الباسبور (بنفسه، مش صورة ولا حد يمضي زي باقي الجنسيات المحترمة، لا طبعًا، لأن مصر ومن يتبعها في فئة "بلاد أخرى" في كل حاجة، وده موضوع تاني طالب شرح أكثر) المهم، الواحد بيعت كل الحاجات دي، والمبلغ المطلوب، وصورة على خلفية بيضا (حاجة كده زي ميه بيضا) ويستنى. بعدها بحوالي أسبوعين الواحد، لو اوراقك مافيهاش مشكلة، تيجي الرخصة، ولأسباب أمنية، يحصلها الباسبور، بعد طبعًا ما ريق الواحد يكون نشف من الخوف أن الباسبور ممكن يضيع في السكة. مطولش عليكم، بعدها الواحد يقدر يحجز في الامتحان النظري، والامتحان النظري مكون من جزئين واحد قصة "اسئلة" والتاني مناظر"مواقف" ، وطبعًا تحجز الامتحان و"تدفع برضه، وبعدين تلف على المكتبات لشراء السي دي الخاص بالتدريب على الامتحان، وتدفع برضه. وتقعد بقى تذاكر وتذاكر ... وأنت بتذاكر تفتكر من كام سنة كنت بتسوق، وكام حاجة من الحاجات دي مخطرتش على بالك في شوارع الملاهي في القاهرة الكبرى، وضواحيها. تجرب الامتحان تسقط ثلاث مرات وتنجح مرة (وتفتكر الثانوية العامة)، لأن الإجابات شبه بعضها وأنت تعبت خلاص (الناس تقولك، رخصة السواقة هي أهم انجاز في حياة أي انجليزي، وناس دخلت الامتحان مرتين، وثلاثة وعشرة) وتحس أنه يخرب بيت اليوم اللي قررت فيه تدخل تمتحن السواقة في بلاد الفرنجة وتقول لنفسك ماله الأوتوبيس يعني؟؟؟؟؟
ده غير مدرس السواقة
وخبرة الامتحان نفسه
والامتحان العملي

1 comment:

beastboy said...

تحديث: يوم الأثنين 14 نوفمبر : نجحت في الامتحان ..هييييييييييه، فاضل الامتحان العملي. حكايات كتيرة، بس الخلاصة: رخصة السواقة هنا صعبة جدًا علشان حياة البني آدم غالية قوي ومهمة جدًا جدًا