النهاردة حلمت حلم غريب قوي، قررت أدور ممكن يكون إيه رمز الحلم ده، وجه منين، النهاردة كمان بالمناسبة الست نعامة كاتبة عن الأحلام. وكان تفسير الحلم هو أني عندي أزمة هوية!!!! أزمة هوية، خير اللهم أجعله خير، ودي بتيجي للواحد من إيه الحكاية دي، سحلية عدت من على رقبتي وأنا نايمة ولا إيه اللي حصل لي بالضبط؟؟؟؟ وشغلت الفهامة شوية وقعدت كالعادة أسأل نفسي أسئلة كتير:
يا ترى ده هو الأحساس بالغربة هو اللي ممكن يتسبب في أزمة الهوية؟؟؟
يمكن وجود الواحد في بلد الناس بتتكلم فيها لغة غير لغته الأصلية؟
طيب ولو الناس كلها بتتكلم اللغة نفسها وتحس وسطهم برضه بالغربة يبقى إيه ده؟؟
طيب لو الواحد حاسس بالغربة في بلده وبرة بلده تبقى عنده هوية إزاي؟؟
وإيه هو تعريف الهوية بقى من الأصل؟
طيب إيه ممكن يكون حل الحكاية دي؟
جايز الحل أني محلمش تاني؟
أو أحلم وبلاش أعرف التفسير؟
أو يمكن أسهل أبطل تفكير :)
4 comments:
El wa7ed momkn ye7es bel ghorba m3 nafso howa, 7ata lw kan kol she2 7waleh akher tamam.
للأسف أنا مش حقدر أدي حل
لإن ببساطة الإنتماء بحسه ف المنافسة بيخليني أحس إني منتمي لجامعتي و لكليتي و لمدينتي ثم لبلدي أو ف الإغتراب لإن الغربة بتعلي إحساس الحنين
أزمة هوية؟! أعتقد انها حاجة كبيرة جدًا.
يا ترى الحلم كان ازاي عشان يخليكي تحسي بأزمة هوية؟
الست نعامة: تقريبًا حلمت أني اتسرقت، كل أوراق اتسرقت.حاجة كبيرة فعلاً
وش مكرمش، انا لم أسأل أحد عن الحل، أشكرك على المحاولة، دي مجرد فضفضة
إيمان: فكرت كتير في كلامك، فعلاً عندك حق، ودي بتبقى تقريبًا بداي لشعور أوسع بالغربة، أو نتيجة لغربة ما بره نفسه!
Post a Comment