ماليش مزاج اترجم قوي، وماليش مزاج أدور وأدعبس يا ترى الفيلم اتعرض في مصر ولا لأ. الفيلم قديم من 2004 وبيحكي عن جيمس بيري مؤلف بيتر بان، والعيلة "أربع أولاد وأمهم" اللي استوحى من وجوده معاهم فكرة روايته العبقرية "بيتر بان". شفت الفيلم ثلاث مرات قبل كده، وكل مرة في المشهد قبل الأخير لغاية المشهد الأخير اقفش نفسي بعيط، الأم وهي بتتفرج على المسرحية، وطريقة انتقالها للعالم الآخر. الإخراج رائع، والتنقل بين الواقع والعالم التخيلي غير عادي، الفيلم عن الإيمان بشيء ما. التصديق، يعني لو الأطفال صدقوا في وجود الجنيات هيعيشوا
I do believe in fairies
وفكرت، يعني لو أنا صدقت أن الظلم في يوم من الأيام هينتهي، وان الناس في مصر هتعيش في أمان ومش في رعب الظلم اللي ممكن أي شخص يتعرض له في أي وقت ده هيحصل بجد؟ أكيد طبعًا الناس اللي اعتصمت واتقبض عليها مصدقة ومؤمنة باللي هي بتعمله، أمتى أنا كمان أصدق؟؟ أمتى هيكون عندي إيمان وأمل ان فيه حاجة هتتغير؟؟؟؟ يا ترى ده ممكن يحصل؟؟؟ ويا ترى لو صدقت بجد هقدر أنا كمان أروح زيهم أعمل مظاهرة واعتصم وأخاطر بحياتي اللي ممكن تضيع بضربة شومة من عربجي؟؟؟
ممكن يا ترى؟؟؟
1 comment:
هو الفيلم فعلاً إتعرض فى مصر
وانا دخلته فى السينما السنة اللى فاتت
أنا فاكر المشهد اللى إنت بتتكلم عليه أنا برضوه دمعت فيه
الصراحة مقدرتش أمسك نفسى بالرغم من إنى عندى حساسية فى عينيا بتمنعنى من
البكا
المهم إنى قريت نص البوست الأولانى ولقيتنى متفق معاك مية فى المية
كملت للأخر لقيت برضوه إنى متفق معاك مية فى المية أنا برضوه نفسى إنى يكون عندى إيمان بأن فيه حاجةممكن تتغير
الصراحةاليأس بقى واخد مساحة كبيرة جداً من حياتى
أسف طولت عليك بس فعلاً الفيلم ده عيشنى ساعتين من أجمل ساعات حياتى
Post a Comment