Friday, December 07, 2007

مطرة، وضلمة وطاقة نور

الجو مطرة بشعة

عادى ما احنا في بلاد الضباب

يوم زي كل الايام الممطرة الضبابية المظلمة

وياللا على المدرسة، وعلى الشغل

اليوم الشغل على مسافة سواقة مدتها ساعة

المساحة تعمل باقصى سرعتها في محاولة لترك مساحة بسيطة للرؤية

صوت محمد منير يعمل كخلفية للمشهد الدرامي

المشهد يزداد قسوة والسواقة تزداد صعوبة

حاجة عادية يعني، إيه الجديد اهدي كده وكملي

ياترى هوصل

عادي كل مرة بتقولي كدة وبتوصلي

آه يا اسمراني اللون ، حبيبي يا اسمراني

يا عيوني نسياكي عيون حبيبي الاسمراني

الواحد لازم يكون متفائل

في الجو ده بالذات الواحد لازم يفكر في حاجات حلوة

حاجة حلوة

الكورال والحفلة اللي جاية

الموسيقى وكلمات الاغاني الحلوة القديمة

انت رسيت وانا وسط الشوق حيران من غير مجاديف

استرجع سلسلة الإيميلات اللي قريتها

الحملة ضد ساويرس

قهوة الصبايا للمحجبات فقط

قصيدة نجم الاخيرة علشان انت مصري

افكر في العودة القريبة

وينتهي الطريق السريع

محمد نوح في خلفية كتابتي بيتكلم عن مصر

بيقطع حبل افكاري

كفاية كده النهاردة يا مدام بونجور

2 comments:

karakib said...

لما تسيبي بلاد الضباب
و تيجي لبلاد الشمس
ابقي شوفي فيلم يوسف شاهين الاخير

Gid-Do - جدو said...

العزيزة امانى

الرمزية فى عنوان التدوينة ماشية مع الحقيقة وكمان مع الواقع المؤلم الحاصل فى مصر ـ واسمحيلى اقول وبكل صراحة بحكم انى من جيل اتربى فى حى شبرا فى القاهرة وهو حى مشهور بتعايش المصريين مسيحيين ومسلمين مع بعض جيران ويكفى انك فى الصبح تسمى الجيران ـ صباح الخير ياام جورج وترد ام جورج يسعد صباحك ياام محمد ـ وزملاء الدراسة فيكتور ورامز وعاطف وسليمان داود وابراهيم عازر وغيرهم من اول المدرسة الابتدائى لغاية الجامعة ونحن اصدقاء وزملاء لم يكن احد منا يفرق بين صاحبة نتبادل السعف فى حد السعف والستات تحط الكحل فى سبت النور وامى تطبخ قلقاس فى عيد الغطاس وهكذا كانت الحياة ـ معلش طولت فى هذا الجزء ـ وارجع اقول بما انى من هذا الجيل اعلن ان ما يحدث فى مصر مؤامرة مدفوعة الاجر لغراب مصر وتحويلها الى بلد طائفى زى لبنان ـ قهوة الصبايا مؤامرة مدفوعة الاجر ـ اقحام سويرس فى الدين مؤامرة مدفوعة الاجر ـ فية حد مستفيد من كل دة ولازم من الوقوف مع بعض ضد هذا العتة لان الاجيال الجديدة اذا اتربت بهذا الاسلوب يبقى تحقق الهدف والمسالة مش محتاجة غير فى حدود عشر سنوات كمان لما الاولاد والبنات اللى عمرهم عشر سنين يبقوا عشرين سنة وتضيع كل حاجة حلوة فى مصر

العزيزة امانى

الزجل بتاع احمد فؤاد نجم معبر عن الواقع اللى الناس عيشاة ومش بتعمل حاجة علشان تغيرة وله حق نجم يقلهم جاتكوا الارف على سكتكم ـ لك تحياتى

I wish you and you family Merry Christmas and Happy New Year.