Sunday, May 13, 2007

شوية حاجات ومحتاجات

حاجات كثيرة في دماغي من غير ترتيب معين، مجرد احساس أني عايزة اكتب علشان منساش
حاجات كتير كان نفسي اكتب عنها من وقت ما رجعت من مصر وانشغلت
وبعدين نسيت هو أنا كنت عايزة اكتب عن إيه
وبعدين لقيت الحاجات بتحصل بسرعة
وقررت ان
النهاردة عايزة اكتب عن
صاحبتي اللي قابلتها امبارح
السنة الجاية هتكمل خمسين سنة
إيطالية عايشة في انجلترا من 25 سنة
أول مرة قابلتها كانت من ثلاث سنين تقريبًا
وكانت حالتها النفسية سيئة، كانت بتحب شخص وعايشين مع بعض من فترة ومش عايز يتجوز
خذت قرارها انها هي عايزة تتجوز ولازم تلاقي الشخص المناسب
كان القرار صعب وتلته عملية جراحية صعبة تسببت ليها في مشاكل كثيرة
امبارح قابلتها ومعاها البوم الفرح
اتجوزت وكانت سعيدة
صور الفرح تحفة وهي عروسة جميلة
كانت بتحكي لي عن متاعب المونوبوز
وبتقول بكل بساطة أنا ما اتجوزتش علشان احتياج جنسي
أنا اتجوزت لاحتياج انساني بالرفقة
ده بجد بقى
ده مش مجرد كلام
الواحد ممكن يلاقي شخص يشارك حياته في مشارف الخمسين
الواحد ممكن فعلاً يلاقي السعادة اللي بيدور عليها
***********
النهاردة ولأول مرة عرفت أن بعد مجهود من مجموعات حقوق المرأة في مصر
أصبح في وثيقة الجواز ملحق يمكن فيه أن تكتب المرأة شروطها
وعرفت أن مش ناس كثير بتعرف عنه حاجة لأن المأذون بينصح العريس بانه يخبيه
حد كان يعرف حاجة عن الموضوع ده؟؟؟
************
عايزانا نتفائل بأن بكرة هيكون أفضل
وجايز جمال يغير
ولما شرحنالها أن المسألة صعبة
بدأت تحلم تبقى رئيس جمهورية على طراز روبن هود
تاخذ من الغني وتدي للفقير
بس مش هتخلي حد فقير
كل الناس لازم تعيش كويس
قعدنا نحلم ونتخيل ونخطط ونقول كلام كبير عن العدالة وتحسين مستوى المعيشة والانتاج
وافتكرت سعيد بتاع اوبريت الحصان الخشب
وهوبيقول : وفضلت أحلم بالعيش وأبويا ميضربنيش
واني شاطر ومذاكر
لغاية ما العربية خبتطه ومات
*********
الاسبوع اللي فات اكتشفت أن أنجوي (العصير) بيتباع في السوبر ماركت هنا
وطبعًا جرى رحت اشتري مانجة وجوافة
فرحت وأنا شايفة
made in Egypt
بالخط العريض مكتوبة
ويافرحة ماتمت خدها سوء التصنيع وطار
غطاء العلبة بايظ
**************
وبمناسبة التصنيع
اشتريت شريط تامر حسني الجديد آخر مرة كنت في مصر
لقيت وش فاضي
والغريبة أني اشتريته من فيرجين
مش من عربية شرايط مضروبة
ياللا يمكن المنتج عايز يقول إن الوشين زي بعض
أو زي الصعيدي اللي حب يقعد في هدوء شغل شريط فاضي
******************

4 comments:

Desert Rose said...

جميلة هى حاجاتك
اعجبنى موقف صديقتك، اتمنى لها كل السعادة

egiziana said...

ياه كالعادة حكاياتك كتيرة و متنوعة.
بس عجبيتني حكاية الصديقة العروسة،
و عايزة اعرف أكتر عن موضوع وتيقة الجواز الجديدة، و ليه مش معلنة،

قوس قزح said...

قولى لصاحبتك ذات الخمسين الف الف مبروك... الفرح والاحتياج الانسانى مالوش سن... ومتزعليش على العصير، انشاء الله هيغيروا الغطاء وينزل السوق تانى. ده إحنا جدعان أوى...أما عن بند شروط المرأة فى الجواز، طبعاً مسمعناش حاجة!!!

Sokomonoce said...

مبروك يا عروسة على شريك سعادتك
---------------------------------
اما بقى موضوع الوثيقة اعتقد ان لوالعرسان محتاجين لوثيقة للحفاظ على حقوق اى من الطرفين او لتنظيم العلاقة ما بين الطرفين فمن رأى انهم ما يتجوزوش من اصله لان لو استنينا ان القانون يحقق العدالة بين اثنين يتشاركوا الحياة فى سرير واحد (ولا اقصد العلاقة الجنسية فقط ولكن اقصد الزواج بمشتملاته المعنوية والحسية كلها) فمن الافضل الانتظار حتى تحين الساعة لانها ستكون ساعة العدالة والعدل الذى من المفترض ان الزوجين يحافظوا عليه فيما بينهم دون قانون
-----------------------------------
اما موضوع الصناعة المصرية فانشاء الله العلى القدير نقدر ننتظر زى ما صاحبتك انتظرت السنين دى كلها ونلاقى احد المصريين الحقيقيين الذين يهمهم امر مصر ويقدر انه يصنع عصير بعلب مضبوطة
-----------------------------------
واما موضوع جمال الحقيقة ما نقدرش نتوقع شر او خير لان الموضوع معقد شوية واما التكهن فهو من عمل الكهان واحنا ما لناش دعوة بيهم دلوقت