Sunday, December 11, 2005

العيش في الوهم

إهداء إلي سقراط


والعيش هنا مش مقصود به العيش اللي بناكله (طبعًا) ولكن العيشة واللي عايشينها
يعني الواحد بعيش في الوهم، ويبعد عن منغصات العيشة
يعني مثلاً نروح فيلم لذيذ بيتكلم عن حياة خيالية في بلاد جميلة ساحرة، فيها الإنسان قوي
وينتصر الخير على الشر في النهاية
ونسعد بذلك الانتصار الوهمي
ونشعر بالسرور والحبور وعظائم الأمور


مالها بقى العيشة في الوهم
إن الواحد يتخيل أن الشخص اللي هو بيحبه ملاك نازل من السماء
رقيق ولطيف
يتحدث همسًا
ولا يغضب ولا يتأفف
فتصبح حياته هادئة لطيفة لا منغصات فيها


وماله يا خويا وماله!!!؟؟؟


ومثلاً يبقى الواحد بيبص على نفسه وشكله
يلاقي أن الشكل اللي بيحلم به هو اللي هو شايفه
مش شكله الحقيقي مثلاً


وإن الواحد يتخيل وجود الأخبار اللي هو عايزها مش الدرر
اللي مكتوب عليه يسمعها ويشوفها كل يوم


ماله بابا نويل يعني
مالهم الجنيات وماله بيتر بان
ماله لما الواحد يتخيل جنية خفية مستخبية في الحنفية
مش أحسن ما يلاقي طول الوقت نفسه
بيفكر في الأمراض والجراثيم والألم
والقتل والانفجارات والقاعدة والانتخابات


الجنيات دول حاجة لذيذة جدًا
نوع من المخدرات
اللي الواحد بيفكر فيهم علشان ينسى
ينسى الإحباط اللي بيعيش فيه كل يوم
وكل ساعة
والمستقبل اللي لازم يشيل في همه


والعيش في الوهم يا إخواني
والخيال وخلافه
هو الحلم بالحصان الخشب
والعروسة والحاجات
اللي العيال اللي ماتوا من القهر
رجعوا يدوروا عليهم تاني
في اوبريت الحصان الخشب

4 comments:

Sameh said...

حلوة يابو الشخصيات. ما تبقي لنا سوي الخيال. أسلوبك هو السهل الممتنع. تحياتي

Socrates said...

دي ليا؟
يا خبر متشكرة قوي يا شخصية افتراضية
:))

فيه حاجة أحلى من إن حد يهديك حاجة من انتاج الدماغ؟ أحلى هدية يا عم، واسلوبها ناعم

جميلة: صحيح مالها الحياة في الوهم؟ مش فيه أديان شرقية كتير بتعتبر إن كل حاجة حوالينا فاكرينها حقيقة هي وهم؟

مش إحنا في الآخر شوية طاقة ضوء ناقصهم بس
mc2?

والجنية إللي في البلاط (مش في الحنفية على فكرة هئ هئ) والفيلسوفة إللي في التبت مش أحلى من المعيدة إللي في الجامعة ودكتورة الكيمياء الحيوية المخيفة؟

مش ساعات بجد يا شخصية افتراضية بتحس إنك عاوز تتفرج على أهيف فيلم مكرر فيه قصة واحدة ست غنية وما عندهاش عيال وبتعمل ملجأ وكل الناس تنبسط في الآخر؟

أشكرك تاني، أحلى هدية جاتلي قبل الكريسماس بشوية، هأعلقها في الشجرة :))

beastboy said...

سامح، شكرًا على الزيارة وأبقى تعالى دايمًا :)

سقراط العزيز اللذيذة: آه علشانك، شفتي بقى!!! حلو قوي إنها عجبتك، بس أبقي قليلي هتعلقيها إزاي في الشجرة :)
مشيها حنفية علشان القافية
See you soon :)

Socrates said...

ننزلهالك من الحنفية مخصوص :))

yes, see u very soon