بقالي كام يوم بفكر في الحكاية دي، كل يوم بيعدي وكل حاجة وكل شيء مكتوب حاليًا ومن فترة مفيهوش غير حالة التردي والسوء إللى وصلت ليها مصر. بأسأل نفسي كتير السؤال: طيب فاضل إيه حلو في مصر؟؟ اللي بفتكره هي مصر اللي سبتها من حوالي 4 سنين،واللي كان فيها مساويء كتير برضه!! لكن اللي حسيته إن الدنيا اتقلبت في الأربع سنين اللي فاتت. يا ترى ده علشان بقيت عارفة إيه اللي بيحصل ومتابعة الأخبار زيادة عن اللزوم، بس محتاجة الناس اللي لسة شابفة حاجة حلوة في البلد تساعدني، علشان لما أرجع، أرجع وجوايا شوية تفاؤل مش كم القرف اللي واصلنى من كل الناس.
مش عايزة أحس بالوهم ولا محتاجة حد يضحك عليّ بس نفسي حد يكون شايف حاجة حلوة يقول عليها، يصورها ويوصفها. أنا عارفة أن مصر فيها أهلي وأصحابي ودي حاجة مهمة جدًا. لكن إيه اللي يخلي الواحد يستحمل العيشة هناك وميدورش على بلد خابزة زي ما كانوا زمان بيقولوا؟؟؟؟
إيه يا ترى لسه في مصر حلو أو كان وحش واتغير للأحسن؟؟؟؟
